Gjyqtarët dënojnë sulmin ndaj Muminit

Shoqata e Gjyqtarëve e Federatës së Basketbollit të Kosovës ka dalë në përkrahje të gjyqtarit Xhelal Mumini, i cili u sulmua fizikisht nga trajneri i skuadrës së Yllit, Agron Berisha, në ndeshjen Trepça - Ylli, që u zhvillua në kuadër të xhiros 17 në Superligë. 

SHGJFBK ka dalë me një reagim, ku ka kërkuar dënim të merituar për trajnerin Agron Berisha, derisa ka paralajmëruar që në rast të përsëritjes të veprimeve të tilla nga anëtarët e skuadrës së Yllit ndaj personave zyrtar të FBK-së, do të shqyrtohet ofrimet e shërbimeve.

Më poshtë, mund ta lexoni reagimin e plotë, të publikuar në faqen zyrtare të FBK-së.

“Shoqata e Gjyqtarëve e Federatës së Basketbollit të Kosovës, shpreh indinjatën e thellë, ndaj veprimit të trajnerit të KB Golden Eagle Ylli, Agron Berisha për realizimin e sulmit fizik ndaj gjyqtarit Xhelal Mumini, në ndeshjen e xhiros së 17-të, të Superligës, në mes KB Trepça dhe KB Golden Eagle Ylli.

Dënojmë rëndë këtë sulm, duke kërkuar që raste të tilla të mos përsëriten asnjëherë, ndërkaq kërkojmë nga organet përkatëse të Federatës së Basketbollit të Kosovës, që dënimi të jetë meritor për trajnerin Agron Berisha.

SHGJFBK vendosi që në rast të përsëritjes së veprimeve të tilla, nga cilido anëtar i KB Golden Eagle Ylli, ndaj personave zyrtar të FBK-së, do të shqyrtojmë ofrimin e shërbimeve nga SHGJFBK për klubin në fjalë.

Në të njëjtën kohë kërkojmë nga të gjitha klubet, që të respektojnë në përpikëri propozicionet e FBK-së, në mënyrë që të krijohen kushtet për ndarjen e drejtësisë nga ana e gjyqtarëve tanë.

SHGJFBK inkurajon gjyqtarin Xhelal Mumini, që të vazhdoj ngjashëm me ndarjen e drejtësisë, duke i dhënë mbështetje të plotë si edhe personave tjerë zyrtarë të SHGJFBK-së.”