KURIOZITET
Hysenagolli, shqiptari i vetëm i huaj në Superligë!
26 January, 2021 @16:56
Në Superligën e Kosovës në basketboll sivjet kanë vërshuar basketbollistët nga Shqipëria.
Pezullimi i kampionatit shqiptar për shkak të pandemisë dhe dispozita në Propozicionet e Garave për edicionin e sivjetëm, ku thuhet se klubet e Superligës kanë të drejtën e regjistrimit deri të 1 lojtari nga FSHB (Shqipëria) me statusin e lojtarit vendor, janë dy arsyet kryesore për këtë vërshim.
Duke pasur parasysh këtë, shumë skuadra kosovare edhe i kanë hedhur sytë kah Shqipëria për t’i përforcuar radhët e veta.
Si rrjedhojë, për Sigal Prishtinën sot luan Daniel Lekndreaj, për Vëllaznimin Robert Shestani, për Bashkimin Endrit Hysenagolli dhe Julian Hamati, gjersa Klein Strazimiri dhe Frenki Lilaj kaluan periudha të shkurtëra me skuadrat e tyre Trepça, përkatësisht Golden Eagle Ylli.
Ndryshe nga krejt këta lojtarë nga Shqipëria që kanë statusin e lojtarit vendor në Superligë, i vetmi që po dallon është qendra e Bashkimit, Endrit Hysenagolli.
Ky i fundit te prizrenasit ka statusin e lojtarit të huaj pasi që ekipi në përbërjen e saj ka dy lojtarë nga Shqipëria, ndërsa sipas rregullave vetëm njëri prej tyre mund të luajë si vendor.
Pasi që te Bashkimi Julian Hamati ishte transferuar më herët, ekipi e ka paraqitur atë si lojtar vendor, ndërsa Hysenagolli, i transferuar më vonë, së bashku me basketbollistët amerikanë të ekipit luan me status të lojtarit të huaj.