VUSHTRRIA - PENZA
Idrizaj double-double për fitoren e parë
20 October, 2018 @16:02
Klubi i basketbollit Penza, ka arritur fitoren e parë në basketboll në konkurrencën e meshkujve sot, duke e mposhtur Vushtrrinë si mysafir.
Basketbollistët pejanë, të udhëhequr nga Allen Idrizaj që shënoi 23 pikë e 18 kërcime në ndeshje kanë arritur që të dalin triumfues në përballjen ku ekipi shpërtheu në pjesë të dytë, për përfundimtaren 64-83.
Përveç Idrizaj, te ekipi i Penzës u dallua edhe trajneri-lojtar, Taulant Dupa, që përfundoi takimin me 18 pikë e 13 kërcime, ndërsa pikë dyshifrore shënuan edhe Fisnik Kraki dhe Ermal Bojku, nga 10 secili.
Te Vushtrria, që përjetoi humbjen e dytë në dy xhirot e para të stinorit më efikasi ka qenë Butrint Zabërxha me 13 pikë, ndërsa nga 12 sosh i shënuan Arton Hyseni dhe Mendrit Ademi.
Pas kësaj xhiroje, Penza pret Vëllaznimin në Karagaç, ndërsa Vushtrria udhëton në Drenas për tu takuar me Feronikelin.
