Karpos gjobitet për josportivitet

Skuadra e Karpos Sokolit është gjobitur me 5 mijë euro për mosvazhdimin e ndeshjes ndaj Teodos mbrëmë në kuadër të BIBL, ka bërë të ditur faqja zyrtare e ligës.

“Ky akt josportiv është i papranueshëm në botën moderne. Kjo sjellje nuk ka vend në sport, për këtë BIBL do të ndërmerr dënimet si në vijim,” ka bërë të ditur balkanleague.net sot.

Ekipi maqedon kishte lëshuar ndeshjen 2.42 minuta para përfundimit të çerekut të tretë, pasi që trajneri Dragan Nikolic, me urdhër të kryesisë së klubit i kishte thënë lojtarëve që të futen në zhveshtore dhe të mos paraqiten më.

BIBL ka regjistruar ndeshjen me rezultat 20-0 në të mirë të Teodos, ndërsa Karposit ia ka mohuar edhe pikën e humbësit. Për më tepër, ekipit i është bërë e ditur se nga borxhet e akumuluara për të vazhduar garat duhet të paguajë 6 mijë euro shtesë, jo më vonë se të premten, 24 shkurt 2017, në ora 12:00.