Klubi e falenderon kryetarin pasi dorëhiqet

Një ditë pas largimit të tij nga posti i kryetarit të klubit, FC Feronikeli’74 ka falenderuar Erlind Krasniqin për kontributin e dhënë në detyrën që e kreu. Klubi i Feronikelit’74 në një postim në llogaritë e rrjeteve sociale ka bërë të ditur se “do të jenë së bashku” ndërsa i kanë uruar suksese në karrierën e ardhshme Krasniqit, i cili përmes një statusi në llogarinë e tij në Facebook & Instagram bëri të ditur se nuk do të jetë më pjesë e klubit.

“Një falënderim i veçantë Presidentit Erlind Krasniqi për angazhimin dhe kontributin e tij në klubin e futbollit Feronikeli. Frymëzuese është të shohësh liderë që punojnë për të mirën e komunitetit dhe për të promovuar sportin.
Falënderim që keni marrë përsipër të riktheni klubin në Superligë. Suksese të mëdha në karrierën dhe jetën tuaj.
Gjithmonë do të jemi së bashku!” — shkroi njoftimi i FC Feronikeli’74 të dielën pasdite.

Feronikeli’74 që në stinorin e kaluar arriti për herë të parë në Superligë, mbeti aty falë fitores në ndeshje barazhi ndaj Prishtinës së Re. Mirëpo, këtë stinor gjërat janë vështirësuar për ekipin, pasi që ende nuk kanë shijuar asnjë fitore dhe janë të fundit në renditjen tabelare.

Gjatë javës së kaluar Feronikeli’74 mori një vendim për tërheqje nga garat, mirëpo dy ditë pas mori vendim për vazhdim në gara. Feronikeli’74 që nisi stinorin me trajnerin Shefki Kuqi, aktualisht është duke e vazhduar me italianin Giovanni Colella. Ekipi para tre stinorëve fitoi Ligën e Parë - Grupi A për tu bërë pjesë e Superligës. Aktualisht është i dhjeti (i fundit) në tabelë të Superligës me vetëm 3 pikë nga 13 ndeshjet e para të stinorit.