Drita kap momentumin, mposhti Ferizajin dhe mori kreun

Drita ka shënuar fitore ndaj Ferizajit sot si mysafir për të dalë në krye të renditjes së Superligës me 25 pikë nga 12 ndeshje. Pjesa e parë ka qenë shterpe në ndeshje me disa gjysmëraste, ndërsa në pjesë të dytë ekipet u aktivizuan.

Vendasit e drejtuar nga Arsim Abazi morën epërsinë në saje të golit të Betim Haxhimusës, pas një aksioni të mirë organizuar, ndërsa futbollisti ferizajas nuk festoi golin ndaj ish-ekipit të tij. Ai u asistua nga Albion Kurtaj, ndërsa aksioni u nis nga kapiteni i shkëlqyeshëm i skuadrës, Edon Sadriu.

Por, epërsia e Ferizajit nuk zgjati shumë. Drita u këndell, nxorri penallti që u vërtetua nga VAR dhe me Besnik Kransiqin e pagabueshëm barazoi. 11-metërshi u fitua pasi që Arb Manaj u ndalë në zonë nga Ermin Imamovic. Shpejt, Krasniqi asistoi edhe në golin e fitores, në momentumin që kishte kapur Drita pas golit të barazimit.

TABELA AKTUALE

Gjuajtje e lirë dhe qendërmbrojtësi Bejtulai shënoi me kokë për fitore: Ferizaji - Drita 1-2 [Betim Haxhimusa 60’ - Besnik Krasniqi 68’pen., Egzon Bejtulai 72’]. Deri në fund të ndeshjes, Drita kishte edhe dy raste të mira për shënim, por në të dyja rastet nuk arritën. Njëherë Blerim Krasniqi qëlloi shtyllën e vendasve me kokë (80’), ndërsa në kohën shtesë Ibrahim Salifu s’arriti gjithashtu me kokë, ta konkretizojë pasimin e Blerim Krasniqit zëvendësues (90’+2). 

Fitorja, çon Dritën në krye të tabelës. Gjilanasit e drejtuar nga Zekirija Ramadani tash kanë 25 pikë nga 12 ndeshje të luajtura pas 13 xhirove. Ndërkaq Ferizaji është i nënti, i parafundit në tabelë, me 14 pikë nga 13 ndeshje të luajtura. Skuadrat pas kësaj fundjave, shkojnë në pushim 10-ditor për shkak të ndeshjeve të reprezentacioneve në kuadër të Ligës së Kombeve.