TË HUAJT E YLLIT

Pamje nga festa e tifozëve të Yllit gjatë Final Fourit 2015/ BOROZANI/Lis Dorambari

Kush janë përforcimet e Yllit?!

23 September, 2015 @10:20

Skuadra që stinorin e kaluar befasoi shumëkë në Superligë, si në ndeshje ashtu edhe në organizim, Ylli i Suharekës, ka paraqitur kërkesë për 4 basketbollistë të huaj në stinorin 2015/16.

Montrael Scott, Landon Atterberry, Dwan Caldwell dhe Malin Baker, janë emrat që janë dorëzuar në FBK nga drejtuesit e Yllit, derisa më para ata kishin bërë të ditur edhe për përforcimet vendore si Fisnik Juniku, Kreshnik Juniku dhe Altin Morina.

Montreal Scott

Scott është amerikan i cili së fundi ka veshur fanellën e Prairie View në SHBA. Ai është lojtar i pozitës një, ndërsa është i gjatë 190 centimetra.

Në 29 ndeshje të zhvilluara për Panterët e Prairie Viewit, Scott ka pasur mesatare prej 34.2 minutave për ndeshje, me 15.4 pikë, 1.8 asistime dhe 4.3 kërcime si mesatare.

Dwan Caldwell

Dwan Caldwell është lojtar që luan në pozitën e alo-qendrës. Ai është amerikan 203 centimetra i gjatë ndërsa së fundi ka luajtur në Austri për ekipin e Furstenfeldit.

Derisa ishte pjesë e ekipit nga NCAA Tennessee Tech University ai ka pasur mesatare prej 26.7 minutave lojë me 11.7 pikë, 5.3 kërcime dhe gjysmë bllokade për ndeshje.

Landon Atterberry

Landon Atterberry është amerikani tjetër, që njihet si depërtues dhe luan në pozitën tre. Ai ka luajtur për Brooklyn Blackbirds në dy vitet e fundit derisa është i gjatë 198 centimetra.

Atterberry në 27 ndeshjet e zhvilluara së fundi me ekipin e tij ka pasur mesatare prej 20 minutave lojë, me 7.6 pikë të shëunuara, 4.4 kërcime dhe 0.4 asistim për ndeshje.

Tjera

Për Malik Bakerin nuk janë gjetur statistika valide.

Ylli stinorin e kaluar ka arritur të kualifikohet në Play Off të Superligës si dhe Final Four të Kupës së Kosovës. Ylli përndryshe ka qenë edhe organizator i ndeshjeve të Final Fourit që u zhvilluan në palestrën e tyre në Suharekë.

Ata më parë kanë vazhduar edhe me qendrën vendase, Urim Zenelaj, derisa kanë ndarë rrugët me Artin Gashin.

Ylli gjithashtu nuk ka vazhduar me të huajt e stinorit të kaluar: Derrick Washington, Najee White dhe Charles Hammork.

Trajner i klubit mbetet legjenda e basketbollit të Suharekës, Agron Berisha.