Le të fitojë më i miri

Me tu bërë i ditur lajmi për fitoren e Prishtinës, lidhur me organizimin e Final Four të ligës ballkanike, edhe drejtori i kësaj lige, Shay Shtriks ka thënë disa fjalë para fundit madhor të stinorit - që do të mbahet në Prishtinë. 

“Le të fitojë më i miri,” ka thënë Shtriks duke i falenderuar të gjitha klubet për pjesëmarrje dhe sponsorëve për përkrahje, transmeton faqja zyrtare e ligës ballkanike sot. 

“Jemi para ‘creme de la creme’ të stinorit, para Final Four 2014 dhe jam i bindur se do të ketë ndeshje interesante me nivel të lartë basketbolli. Fat të katër skuadrave pjesëmarrëse në Final Four.” 

Final Four i BIBL mbahet prej 25 deri më 27 prill në Prishtinë, ku për titullin e kampionit të kësaj lige do të luftojnë: Sigal Prishtina - Galil Gilboa dhe Levski Sofia - Balkan Botevgrad; Fituesit e këtyre dy përballjeve takohen në finalen e madhe që do të jep kampionin e stinorit 2013/14 të ligës ballkanike. 

Kampion i dy viteve të fundit në BIBL është ekipi izraelit, Galil Gilboa.