Levski fiton Kupën

Levski Sofia, nënkampion aktual i BIBL dhe rival i Pejës dhe Sigal Prishtinës në këtë ligë ka arritur të mposht ekipin Cherno More për të fituar trofeun e Kupës së Bullgarisë. 

Përkundër se Levski ka udhëhequr gjatë gjithë takimit, momentet e fundit të ndeshjes kanë qenë dramatike, kur finalsti Cherno More ka ngushtuar tepër epërsinë. 

Mirëpo, në fund falë përvojës, Levski ka arritur që të triumfojë me tre pikë dallim, 100-97, duke e çuar në muze të klubit edhe një trofe të radhës. 

Brandon Heath dhe Lionel Chalmers kanë qenë basketbollistët më efikas të ekipit fitues. I pari ka shënuar 31, derisa i dyti 27 pikë në fitore. 

Në duelet me Pejën, Levski është ndarë 1-1, ku të dyja skuadrat kanë shënuar fitore si mysafir, derisa me Sigal Prishtinën, Levski për momentin ka bilanc 1-0 pasi që e kishte mposhtur në Sofje. Ndeshja e fundit në xhirot e rregullta të BIBL, luhet pikërisht në Pallatin e Rinisë dhe të Sporteve ku Sigal Prishtina pret Levskin e Sofjes për revansh potencial.