Lituanezi në Prishtinë

Aloja lituaneze, Aurimas Kieza, është përforcimi më i ri i Sigal Prishtinës për edicionin e ri basketbollistik 2013/14. 

Basketbollisti i gjatë 202 centimetra i cili ka përvojë nga disa vende përveç Lituanisë, nga stinori i ri do të jetë pjesë e skuadrës së Sigal Prishtinës, që është shumë afër edhe marrëveshjes me trajnerin që e përmbylli stinorin e kaluar, Ahmet Kandemir. 

Ai gjatë karrierës së tij ka luajtur për disa skuadra lituaneze si Pieno Zvaigzdes, Juventus dhe Suduva, ndërsa në Itali ka qenë pjesë e Trenkwalder Reggina si dhe në Qipro ka luajtur për Keravnosin. 

Kieza në stinorin 2010/11 ka qenë MVP i ligës lituaneze. Sigal Prishtina do të merr pjesë në Ligën Ballkanike BIBL stinorin që do t’ia nis dhe ky është përforcimi i tretë për fituesin e Kupës së Kosovës, pas amerikanëve Ceola Clark III dhe Tay Waller. 

Basketbollistët lituanez vjet thyen ‘akullin’ kosovar, kur Bashkimi pat transferuar lituanezin Rokas Uzas. Prej këtij stinori përveç Sigal Prishtinës, edhe RTV 21 ka paralajmëruar një lituanez në radhët e tyre, Marius Kasilevicius.