PAS STËRVITJES SË PARË
Marmarinos: Kemi pak kohë, të përgatitemi sa më mirë
17 February, 2020 @17:22
Selektori i ri i Kosovës, Christos Marmarinos, sot edhe zyrtarisht ka mbajtur stërvitjen e parë me reprezentacionin e Kosovës, ndërsa në ftesën e tij janë përgjigjur të 17 lojtarët e ftuar për ndeshje ndaj Islandës dhe Luksemburgut.
Në fakt, 5 prej 17-shes do të bien nga lista në ditët e ndeshjes, pasi që vetëm 12 lojtarë kanë të drejtë paraqitjeje në listën përfundimtare të ndeshjes.
Greku është shprehur të jetë i lumtur me punën e filluar, ndërsa ka bërë të ditur se ka pak kohë për tu përgatitur.
“Kemi filluar mirë stërvitjet dhe do të mundohemi të përgatitemi sa më mirë, pasi nuk kemi shumë kohë. Synimet janë të fitojmë. Atmosfera në ekip është shumë e mirë. 17 Shkurti është ditë e rëndësishme për Kosovën. Është e rëndësishme që lojtarët që bartin fanellën e Kosovës të përfaqësojnë sa më mirë shtetin në garat ndërkombëtare,” ka thënë Marmarinos për FBK-në.
Kosova bën pjesë në Grupin B parakualifikues të zonës evropiane për Botërorin 2023 të basketbollit. Në grup si kundërshtarë ka Islandën, Sllovakinë dhe Luksemburgun. Kosova do të duhet të përfundojë në njërën prej dy vendeve të para që të sigurojë fazën e ardhshme të kualifikimeve.
Më 20 shkurt Kosova pret Islandën në Prishtinë, ndërsa më 23 luan ndaj Luksemburgut si mysafir.