KUPA E PRISHTINËS
Mbrojtja solli kupën
28 April, 2013 @23:55
Sigal Prishtina është fituese e Kupës së Kosovës për stinorin 2012/13. Ekipi nga kryeqyteti në finale e mposhti Pejën me rezultat të ngushtë 55-54 për ta ngritur kupën midis palestrës Sezai Surroi të Prizrenit.
Çereku i parë i ndeshjes kaloi me dominim të lehtë të pejanëve të cilët krijuan epërsinë prej tre pikëve 20-23, ndërsa me lojë të mirë u dallua Cyril Awere i cili bëri disa ngulitje atraktive dhe realizoi 7 pikë në këtë pjesëlojë.
Në dhjetëminutëshin e dytë rezultati u kthye në të mirë të Prishtinës. Bardhekaltërit pjesën e parë e përmbyllën në epërsi 38-34 falë pikëve të basketbollistëve shtatëlartë si Julian Terrell, Akida McLain dhe Fisnik Rugova.
Çereku i tretë ishte i barabartë 13-13 dhe prishtinasit e ruajtën epërsinë e katër pikëve pranë rezultatit 51-47.
Prishtina me vetëm 4 pikë në çerekun e katërt!
Në çerekun e katërt Sigal Prishtina mbeti e bllokuar në sulm pasi që shënoi vetëm katër pikë (Fahri Breca dhe Fisnik Rugova nga dy pikë). Por mbrojtja e fortë e ekipit të Ahmet Kandemirit, i cili këtë gjë e konfirmoi edhe në intervistën e pas ndeshjes, bëri që kupa të përfundojë në duart e basketbollistëve prishtinas.
Heroi i gjysmëfinales kundër Sigkos Bashkimit, Dardan Berisha, e kishte rastin që edhe njëherë të shpallet hero pasi në sulmin e fundit të pejanëve tentoi për tre pikë, por kësaj radhe fati nuk ishte pranë tij.
Qendra pejane, Cyril Awere ishte koshashënuesi më i mirë i ndeshjes me 19 pikë, derisa Akida McLain realizoi dy më pak. Dardan Berisha ishte vetëm lojtari i tretë në ndeshje që shënoi pikë dyshifrore me 10 sosh.
SIGAL PRISHTINA (Statistikat individuale)
1 | Akida McLain | 17 pikë | 8 kërcime | 2 asistime/ 1 bllokadë |
2 | Julian Terrell | 9 pikë | 10 kërcime | 7 asistime/ 2 bllokada |
3 | Granit Rugova | 9 pikë | 5 kërcime | 1 asistim |
4 | Fahri Breca | 8 pikë | 3 kërcime | 3 asistime |
5 | Fisnik Rugova | 6 pikë | 9 kërcime | 1 asistim |
6 | Edmond Azemi | 6 pikë | 7 kërcime | 1 asistim |
PEJA (Statistikat individuale)
1 | Cyril Awere | 19 pikë | 7 kërcime | |
2 | Dardan Berisha | 10 pikë | 4 kërcime | 4 asistime |
3 | Samir Shaptahovic | 9 pikë | 5 asistime | 3 kërcime |
4 | Alban Veseli | 8 pikë | 3 kërcime | 2 asistime |
5 | Gerti Shima | 6 pikë | 5 kërcime | |
6 | Blerim Mazreku | 2 pikë | 3 kërcime |