Me rekord stinori Rahoveci ndaj Boreas

Skuadra e Rahovecit me plotë kuptimin e fjalës ka demoluar Borean në Mizahir Isma sonte për të shënuar fitoren më të thellë të stinorit si dhe për tu bërë ekipi me më së shumti pikë të shënuara për ndeshje këtë stinor.

Vreshtarët kanë mposhtur pejanët e zbehtë sonte me rezultat 159-54, me 105 pikë dallim! Ndërsa Fred Richardson shënon numrin rekord të pikëve këtë stinor, duke shënuar 53 pikë në fitore, shto këtu edhe triple-double me 10 kërcime e 13 asitime.

TABELA AKTUALE

Përveç Richardsonit pikë dyshifrore kanë shënuar edhe 5 lojtarë të tjerë të Rahovecit, ku James Stanback ka shënuar 26, Andrew Washington 17, Bardh Rexha 14, Rron Grapci 11 dhe Indrit Krasniqi 10 të tjera.

Kjo ka qenë fitorja e 14 e stinorit për Rahovecin, që për momentin kalon në pozitë të dytë të klasifikimit, derisa Borea mbetet e fundit në klasifikim me gjasa të vështira për shpëtim në Superligë.