Me trajnerin më të mirë, luftojmë për trofe

Ndër basketbollistët më të dalluar të Yllit, Samir Zekiqi, në deklaratën e tij para ndeshjeve të Final 8 të Kupës ka thënë se ekipi nga Suhareka synon jo vetëm Kupën e Kosovës, por të dyja trofetë!

Ai ka bërë të ditur se Ylli ka trajnerin më të mirë në ligë, malazezin Dragan Radovic, që kishte korrur sukses historik me Bashkimin, duke i bërë këta të fundit kampion për herë të parë në histori të klubit.

SKEMA e KUPËS

E tash, sipas mitrovicasit Zekiqi, edhe Ylli synon së paku të njëjtën.

“Ne jemi përgatitur maksimalisht për garat e Kupës. Synimet tona janë gjithmonë që të fitojmë, sepse e kemi cilësinë. Gjithashtu atmosfera në skuadër dhe në qytetin e Therandës është e mrekullueshme. Kemi trajnerin më të mirë në ligë dhe do të luftojmë deri në fund, që të fitojmë dy trofetë e basketbollit kosovar,” ka thënë Zekiqi për faqen zyrtare të FBK-së.

ORARI I NDESHJEVE

Por, Yllin në ndeshjen e parë të tyre që luhet nesër pasdite në Mizahir Isma të Rahovecit e pret kampionia dhe mbrojtësja e Kupës, Prishtina.

Do të jetë vështirë, por jo edhe e pamundur për ekipin e Yllit që të arrihet kualifikimi. E ndeshja Prishtina - Ylli luhet prej orës 19:00 në Mizahir Isma.