Mundësia e fundit për Herolind Shalën!

Mesfushori 25 vjeçar i përfaqësueses së Kosovës, Herolind Shala, do të duhet të jetë në formën e tij jetësore në ndeshje ndaj Islandës.

Së paku kështu ka lënë të kuptohet selektori Albert Bunjaki në konferencën e djeshme për shtyp, kur ka cekur se nëse Herolindi vazhdon të mos aktivizohet me ekipin e tij Kasimpasa, nuk do të ftohet në qershor për ndeshje ndaj Turqisë.

“Herolindi s’po luan shumë, por paraqitja e tij e mirë në ndeshjen e fundit ndaj Turqisë, nuk na lejon të mos ftohet. Por, ai e di se kjo situatë është e papranueshme dhe nëse vazhdon kështu, në qershor nuk do të jetë me ne,” kanë qenë fjalët e Bunjakit për mesfushorin.

Herolind Shala, para se të bëhej pjesë e Kosovës, ka luajtur edhe për kombëtaren shqiptare, por nuk ishte përzgjedhur nga Gianni De Biasi për 23-shen përfundimtare për EURO 2016.