Natë historike

Sigkos Bashkimi ka arritur që të shënojë fitore ndaj Sigal Prishtinës për herë të parë pas majit të vitit 2009. 

Katër vjet pritje kaluan sonte dhe portokallët e Prizrenit të udhëhequr maestralisht nga dyshja amerikane Kejuan Johnson dhe Mark Dawson, me lojë fantastike dhe luftë të pakompromis arritën që të shpaguajnë mallin e prizrenasve. 

Ndeshja ka qenë e barabartë gjatë gjithë kohës, përveç çerekut të parë kur Sigkos Bashkimi kishte një përparësi pak më të madhe. 

Sigal Prishtina ka arritur të kthejë avantazhin dhe të dalë në epërsi, të cilën e mbajti deri kah mesi i çerekut të fundit, kur ekipi i udhëhequr nga Muharem Vugdalic, ka kaluar në epërsi për të mos e lëshuar deri në fund të takimit me luftë të madhe.

Koshashënuesi më i mirë i ndeshjes ishte Kejuan Johnson i Sigkos Bashkimit me 27 pikë të shënuara duke qenë i pandalshëm për mbrojtjen mysafire, ndërsa krahas tij pikë dyshifrore shënuan edhe Rokas Uzas, Mark Dawson dhe Muhamed Hasani.

Në anën tjetër, 18 pikët e qendrës Akida McLain dhe 15 të tjera të Granit Rugovës ishin të pamjaftueshëm për të dalë të pamposhtur prishtinasit nga palestra e nxehtë në Prizren.

Me këtë fitore, Sigkos Bashkimi i është afruar vetëm një pikë Sigal Prishtinës, që gjendet në vendin e dytë të radhitjes tabelare të BKT Superligës.

Xhiron e ardhshme Bashkimi do të udhëtojë në Vushtrri për t’u përballur me Trepçën, ndërsa Prishtina, pas dy humbjeve të njëpasnjëshme do të synojë t’i kthehet fitoreve në përballjen me Vëllaznimin.

 

BKT SUPERLIGA, SONTE:

Sigkos Bashkimi - Sigal Prishtina

83-79 Rezultati përfundimtar

(25-17; 40-39; 55-60 dhe 83-79)

Koshashënuesit e Sigkos Bashkimit

1	Kejuan Johnson	27 pikë
2	Rokas Uzas	18 pikë
3	Mark Dawson	17 pikë
4	Muhamed Hasani	16 pikë
5	Qëndrim Biraj	3 pikë
6	Valentin Spaqi	2 pikë

Koshashënuesit e Sigal Prishtinës

1	Akida McLain	18 pikë
2	Granit Rugova	15 pikë
3	Julian Terrell	12 pikë
4	Edmond Azemi	11 pikë
5	Alvin Snow	6 pikë
6	Fahri Breca	5 pikë
7	Hekuran Binxhija	5 pikë
8	Edis Kuraja	4 pikë
9	Fisnik Rugova	3 pikë