Ndoja i paplakshëm, më i miri i javës në Serie B

Basketbollisti shqiptar, Klaudio Ndoja, është zgjedhur lojtari me performancën më të mirë të javës 13 në Serie B nga faqja Eurobasket.com.

Veterani 35-vjeçar i skuadrës italiane Real Sebastiani Rieti, ka luajtur me double-double prej 25 pikëve dhe 11 kërcimeve në ndeshjen ndaj skuadrës Roma Luiss, që përfundoi me fitoren 71-59 të skuadrës së shqiptarit.

Kjo fitore e ka forcuar Rietin në pozitën e parë në tabelë, i cili lufton për titullin e kampionit në këtë rang të garave në Itali.

Ndoja sivjet në stinorin e tij të parë me skuadrën Rieti, ka mesatare prej 15.8 pikëve për ndeshje, duke u bërë njëri ndër lojtarët kryesorë të ekipit.

Ish lojtari i kombëtares shqiptare është edhe kapiten i kësaj skuadre.

Çastet më të mira të ndeshjes së fundit të Ndojës ku shënoi 25 pikë, i gjeni në videon e mëposhtme.