Në mobilizim

Arben Krasniqi do të ketë detyrë të vështirë tash e tutje. Ai do të duhet të mobilizoj të gjithë basketbollistët që do t’i ketë Kosova në dispozicion për të bërë më të mirën në kualifikimet e para për Eurobasket. 

I vetëdijshëm për vështirësitë që e presin, ai ka thënë se Kosova do të bëj përpjekje maksimale për të arritur më të mirën e mundshme. 

“Ashtu siç kemi pritur në grup na kanë rënë shtete që e kanë basketbollin shumë të zhvilluar, apo më mirë të themi janë fuqi europiane në këtë sport,” ka thënë Krasniqi për faqen zyrtare të FBK-së sot. 

“Mirëpo, sidoqoftë kjo, ne tashmë do të duhet të mobilizohemi dhe të punojmë sa më shumë në ndërtimin e një përfaqësueseje që do të organizohet maksimalisht për të bërë më të mirën në parket në duel me Slloveninë, Ukrainën dhe Bullgarinë. Kjo është hera e parë që Kosova do të garoj në nivel të tillë të garave dhe ne do të bëjmë përpjekje maksimale për të dëshmuar lojëra të mira dhe basketboll cilësor,” ka thënë ai. 

Krasniqi ka vazhduar bashkëpunimin me FBK-në dhe tashmë do të nis të krijojë seriozisht reprezentacionin e Kosovës ashtu që kjo të jetë gati për ndeshjet kualifikuese në Eurobasket 2017. 

Garat nisin më 31 gusht 2016 dhe përfundojnë më 17 shtator. Në këto 6 ndeshje të grupit që do t’i zhvillojë Kosova duhet që së paku të arrijë vendin e dytë në grup për të shpresuar në kualifikim.