Newbasket, anëtari më i ri i Ligës së Parë!

Pasi secila skuadër shënoi nga një fitore në dy ndeshjet e para të serisë finale, Megasportsi dhe Newbasketi, që të dyja nga Prizreni, u përballen sonte në ndeshjen vendimtare në “Sezai Surroi”, ndeshje kjo që e përcaktoi skuadrën që ngjitet direkt në Ligën e Parë të basketbollit sezonin e ardhshëm.

E kjo skuadër është Newbasketi, i cili sonte e mposhti kundërshtarin me rezultat 59-71, për ta arritur kështu ngjitjen në Ligën e Parë.

Newbasketi kishte epërsi në të gjithë çerekët, 17-18 i pari, 24-33 pjesa e parë, 37-49 çereku i tretë, ndërsa nuk lejoi befasi as në të katërtin, për ta mbyllur kështu ndeshjen me rezultatin përfundimtar 59-71.

Kështu, Newbasketi ngjitet direkt në Ligën e Parë sezonin e ardhshëm, kurse Megasportsi për ngjitje në Ligën e Parë e ka edhe një mundësi përmes Play Out-it, ku do të ndeshet me vendin e parafundit të Ligës së Parë, skuadrën e Vushtrrisë.