NewBasket mposht Kosovarin jashtë, një hap para finales së playoffit

Skuadra prizrenase NewBasket ka shënuar fitore ndaj ekipit të Kosovarit si mysafir në ndeshjen e parë gjysmëfinale të playoffit të Ligës së Parë dhe ka marrë epërsinë 0-1 në seri. Ekipit prizrenas të drejtuar nga ish-trajneri i KB Prizrenit, Tuncay Bostanci, tash i nevojitet edhe një fitore për të siguruar finalen e playoffit.

NewBasket mposhti Kosovarin 85-100 ndërsa me 24 pikë lojtari më efikas për ekipin prizrenas ka qenë Rilind Krasniqi. Hajriz Hazeri dha 20 pikë e bëri 12 asistime në këtë fitore, ndërsa 17 të tjera i shënoi Isaac Hill.

Kosovari, që mbylli në pozitë të dytë stinorin e rregullt në Ligë të Parë, nuk ka arritur të shfrytëzojë epërsinë e terrenit vendas, ndërsa 23 pikët e Arti Islamajt dhe 22 të tjera të Adrian Ibishit nuk mjaftuan për të nisur mbarë serinë.

Përballja e radhës e serisë luhet në Prizren, ndërsa nëse fiton NewBasket do të arrijë finalen e playoffit, në të kundërtën, seria shkon në ndeshjen e tretë, ku Kosovari do të jetë nikoqir në përballjen vendimtare.