Peja dënohet me €500

Federata e Basketbollit të Kosovës, përmes një vendimi të marrë sot, ka bërë të ditur se ka dënuar KB Pejën me 500 euro, për shkak të ofendimeve në baza nacionale dhe djegies së flamurit maqedon në tribuna. 

Gjithashtu, Komesari i Garave të FBK-së, Bajrush Ademi, ka dënuar edhe vëzhguesin e ndeshjes Lulzim Maloku, për shkak të paraqitjes jo objektive të fakteve në raportin e ndeshjes, me dy ndeshje mosdelegim në tempon e delegimit, shkruan Vendimi i FBK-së i botuar sot në faqen zyrtare të FBK-së. 

Peja mposhti Prishtinën në këtë ndeshje dhe seria finale u barazua në 1-1. Ndeshja e radhës, zhvillohet në Prishtinë. Kampion shpallet ekipi që së pari arrin 3 fitore.