Peja e treta në turneun e Bullgarisë

Skuadra e Pejës ka përfunduar si e treta në turneun miqësor të mbajtur në Plovdiv të Bullgarisë.

Verdhezinjtë pasi që u mposhtën në duelin e parë nga Beroe, dje kanë mposhtur Academic Plovdivin me rezultat 77-70 dhe kanë siguruar vendin e tretë në këtë turne.

Më të dalluarit te Peja në këtë ndeshje kanë qenë Noah Dahlman me 17 pikë të shënuara dhe LaMarcus Reed, që ka shtuar 16 pikë të tjera.

Verdhezinjtë kanë qenë dukshëm më të mirë sesa Academicu gjatë gjithë ndeshjes, ndërsa në çerekun e tretë kanë pasur epërsi deri në 26 pikë, për të mbyllur ndeshjen me 7 pikë diferencë.

Fitues i turneut ka dalë Beroe, që mposhti në finale Spartak Plevenin 89-79.

Beroe, është rival i Bashkimit dhe Sigal Prishtinës në Grupin A të BIBL.