Peja i kthehet fitoreve

Peja është treguar përsëri e fortë për Trepçën. Lideri aktual në BKT Superligë ka shënuar fitore shumë të rëndësishme me rezultat 69-61 në palestrën Karagaçi, në Pejë.

Loja gjatë gjithë kohës ishte e barabartë, përveç çerekut të fundit ku pejanët u treguan më të koncentruar dhe më të qetë. Dy çerekët e parë Trepça e përfundoi me epërsi me rezultat 18-19 dhe 29-33, ndërsa rezultati përfundimtar i çerekut të tretë ishte në të mirë të ekipit të trajnerit Rudolf Jugo, 53-50.

Më i dalluar në fitoren e Pejës ishte si zakonisht Dardan Berisha, i cili realizoi 26 pikë, ndërsa kontribut të madh dha edhe qendra kroate i cili spekulohej se do të largohet, Zoran Pehar, me 16 pikë të shënuara. Ndërsa debutuesi, Vladan Jocovic, takimin e përfundoi me 7 pikë.

Në anën tjetër, te Trepça, Drilon Hajrizi shënoi 12 pikë, i ndihmuar nga Valdrin Haxhiu me 11 pikë, duke shënuar 3 trepikësha. Pikë dyshifrore shënoi edhe Besnik Azemi (10), derisa dyshja amerikane Mims - LaGrange nuk lanë ndonjë përshtypje të rëndësishme gjatë lojës.

Kjo ishte fitorja e nëntë e Pejës në 10 takime, derisa Trepça e shijoi humbjen e katërt, prej të cilëve dy nga pejanët.

Drita e mposhti Vëllaznimin në Gjilan

Në ndeshjen tjetër të luajtur sot, Drita u njoftua me fitoren e dytë në këtë edicion. Gjilanasit të përforcuar me tre basketbollistë të huaj arritën ta mposhtin Vëllaznimin e Gjakovës me rezultat 87-80, në Gjilan.