Peja, mund të mbetet jashtë BIBL

Si duket, Pejës do ti kushtojë rëndë rënia në Ligë të Parë. 

Përveç mungesës së ndeshjeve derbi të Superligës dhe pjesëmarrjes në katërshen e madhe, pjesë e së cilës është edhe vetë Peja, ajo mund të mos marrë pjesë edhe në Balkan League stinorin tjetër. 

“Bordi i FBK-së është ai që nominon skuadrat që do të luajnë në ligën ballkanike. Mirëpo, nuk pres që mund të luajë aty një ekip që është pjesë e Ligës së Parë të Kosovës,” ka bërë të ditur Sekretari i FBK-së, Leart Hoxha, sot për Kohën Ditore. 

Peja do të shqyrtojë mundësinë e ankesës për përjashtimin nga Superliga, derisa shpreson të merr pjesë në BIBL stinorin e ardhshëm, edhe nëse mbetet skuadër e Ligës së Parë. 

Peja u përjashtua nga elita e basketbollit kosovar, pas një Vendimi të Komesarit të Garave, që u miratua plotësisht nga Komisioni Disciplinor i FBK-së, pas ndërprerjes së ndeshjes finale të Play-Offit ndërmjet Sigal  Prishtinës dhe Pejës.