Peja ndryshe në Karagaç

Skuadra e Pejës ka rikthyer avantazhin e saj në serinë finale të Play Offit.

Verdhezinjtë e mposhtën Sigal Prishtinën me rezultat 66-63, për të kaluar 2-1 në epërsi në seri.

Çereku i parë i ndeshjes kaloi në të mirë të Prishtinës, e cila e përfundoi atë me katër pikë epërsi, 17-21.

Në çerekun e dytë Peja i shtrëngoi dhëmbët dhe kaloi në epërsi, ndërsa në pushim shkoi pranë rezultatit 38-33.

Edhe çereku i tretë kaloi në të mirë të vendasve, të cilët krijuan një avantazh të mirë para dhjetë minutëshit të fundit, derisa në këtë periudhë zënka ndërmjet basketbollistit të Prishtinës, Andrew Warren, me trajnerin e tij, Antonis Constantinides, e prishi paksa motivimin te bardhekaltërit.

Por epërsia e Pejës që ishte dyshifror në fillim të çerekut të fundit, u ngushtua deri në dy pikë, mirëpo në momentet më vendimtare gabimet e Prishtinës, e pamundësuan kthimin e tyre me fitore në shtëpi.

Kevin Burwell ishte koshashënuesi më i mirë në këtë ndeshje për Pejën duke shënuar 17 pikë, prej tyre 4 trepikëshe, kurse te Prishtina u dallua bullgari Stanimir Marinov që shënoi dyë pikë më shumë se Burwell.

Vlen të ceket se për Prishtinën as në këtë ndeshje nuk luajti i lënduari Mohamed Abukar.

Ndeshja e radhës ndërmjet Pejës dhe Sigal Prishtinës do të luhet në Prishtinë.

KB PEJA

KB SIGAL PRISHTINA