Peja përmbys Yllin në fund, për të siguruar finalen

Peja me një lojë të mirë në çerek të fundit dhe ofanzivë të hatashme ka përmbysur Yllin që kishte epërsinë gjatë tre çerekëve të parë, për të fituar gjysmëfinalen e Superkupës dhe për të siguruar finalen e saj.

Peja mposhti Yllin 79-72 për të siguruar finalen e së dielës që nis në ora 17:00 ndaj Trepçës, ku edhe njëra prej tyre do të nis stinorin 2023/24 me trofe.

Pejanët janë rikthyer fuqishëm në pjesën e dytë, duke përmbysur minusin prej 17 pikë në plus dhe për të triumfuar në fund 72:79 (23:18, 18:12, 17:22, 14:27).
Takimi ishte interesant nga fillimi deri në fund, por çerekun e parë më mirë e nisën vendasit, që kishin epërsi deri në gjashtë pikë, 17:11, derisa këtë pjesë e fituan 23:18. Therandasit e ngritën epërsinë deri në 12 pikë, 32:20 dhe ishin në epërsi konstante, duke shkuar në pushim me rezultat 41:30.
Ylli vazhdoi me lojë të mirë edhe në periudhën e tretë, për të thelluar edhe më shumë epërsinë, që shkoi deri në 17 pikë, 58:41, megjithatë nga ky moment Peja u rikthye, duke afruar rezultatin dhe duke e kthyer atë në favor të saj për të triumfuar në fund 72:79.
Te therandasit u dalluan Valon Bunjaku me dhjetë pikë, 11 kërcime e shtatë asistime, Jalen Nesbitt me 14 pikë e 11 kërcime dhe Gëzim Morina me 16 pikë e gjashtë kërcime, ndërsa te pejanët më të mirët ishin Lis Shoshi me 21 pikë e nëntë kërcime, Justin Davis me 17 pikë e shtatë kërcime dhe Jacob Calloway me 20 pikë e pesë kërcime.
Finalja e madhe është të dielën mes Trepçës dhe Pejës në Therandë.