Prishtina kampione

Kampioni i edicionit të sivjetëm në Kosovë është Sigal Prishtina, e cila arriti ta fitojë serinë finale të Play Offit duke e mposhtur Pejën pas pesë ndeshjeve.

Sigal Prishtina e festoi titullin e tretë rresht pas fitores me rezultat 65-70 në ndeshjen që u zhvillua në Karagaç.

Ndeshja që ishte e fortë dhe me rivalitet të madh filloi e baraspeshuar, ndërsa gjatë çerekut të parë Prishtina ishte diç më e mirë duke krijuar epërsi deri në 7 pikë, 9-16.

Kjo epërsi u bë dyshifrore në çerekun e dytë, ndërsa kulmin e arriti një minutë para se skuadrat të shkojnë në pushim, kur me pikët e Mohamed Abukarit, Prishtina iku 14 pikë larg Pejës, 25-39.

Por me të filluar çereku i tretë, skenari ndryshoi dhe Peja në fund të kësaj periudhe arriti ta barazojë rezultatin në 52-52, për të shkuar në çerekun e fundit me përkrahjen maksimale të tifozëve vendas.

Në çerekun e katërt mbrojtja prishtinase e ndali Pejën në vetëm 13 pikë, ndërsa për sulm u përkujdesën dyshja nën kosh, Washburn-Abukar.

Vetëm një minutë para fundit, Peja ishte në epërsi 65-64 me pikët e Roland Davis, ndërsa trajneri i Prishtinës Antonis Constantinides kërkoi për herë të fundit time-out për të ndërhyrë në lojë.

Kjo ishte edhe pika e kthesës, pasi deri në fund Prishtina shënoi edhe gjashtë pikë të tjera, ndërsa Peja u ndal aty ku ishte duke e humbur kështu rastin për ta kthyer titullin në Pejë, të cilin e kishte fituar për herë të fundit tre vite më parë.

Mohamed Abukar ishte lider i Prishtinës në këtë ndeshje, duke shënuar 20 pikë, aq sa shënoi edhe Drilon Hajrizi për verdhezinjtë.

Titulli i tretë sivjet për Prishtinën

Me titullin kampion, Prishtina e përmbylli stinorin e sivjetëm me tre tituj të fituara, pasi më parë e kishte fituar Kupën e Kosovës dhe Ligën Ballkanike.

Statistikat ekipore

Statistikat individuale te Peja

Statistikat individuale te Sigal Prishtina