Qëndrim Kida mposhtë ish-skuadrën, Suhareka fiton në Malishevë!

Fitore e madhe për Suharekën në udhëtim te Malisheva!

Qëndrim Kida ish-skuadrën e tij e mposhti sot 1-2 (Drilon Hazrollaj 73’ / Mevlan Zeka 21’ 40’), duke ia shkaktuar kështu humbjen e katërt sezonale.

Goli i parë i ndeshjes u shënua nga Mevlan Zeka në minutën e 21’, e i njëjti lojtar shënoi edhe për 0-2 me ndihmën e një devijimi në minutën e 40’. Me këtë rezultat u mbyll pjesa e parë.

Mes dy golave të Suharekës, Malisheva pati një gol të anuluar pas një rishikimi të gjatë me VAR. Goli që do të ishte i barazimit u anulua për shkak të një faulli në fazën sulmuese gjatë ndërtimit të akcionit.

TABELA AKTUALE

Gjatë pjesës së dytë, Malisheva ishte më kërkuese. Disa zëvendësime ofansive e loja më kërkuese çuan te ngushtimi i rezultatit, kur Drilon Hazrollaj shënoi për 2-1 në minutën e 73’, por goli i dytë nuk erdhi dot dhe vendasit u detyruan të pajtohen me humbje.

Suharekasit, që sot ishin tejet të diciplinuar në mbrojtje, ndeshjen e mbyllën me 10 lojtarë në fushë, kur krejt në fund të ndeshjes Eneid Kodra (90+6’) u përjashtua nga loja pas dy kartonëve të verdhë.

Fitorja e shënuar sot e vazhdon konsolidimin e Suharekës në mesin e tabelës, ndërkohë Malisheva tashmë bie në vendin e tretë, një pikë prapa Ballkanit.