Radovic: Ishim pranë befasisë

Trajneri i Bashkimit, Dragan Radovic, në deklaratën e tij pas humbjes nga Teodoja që e pësoi mbrëmë dhe e eliminoi atë nga BIBL për këtë stinor ka thënë se kanë qenë shumë afër befasisë pas startit të dobët që kishte ekipi këtë stinor në BIBL.

“Ne kemi qenë pranë befasisë, pasi që kemi nisur keq stinorin në BIBL me katër humbje rresht. Ishim në situatë kualifikimi, por nuk arritëm,” ka thënë fillimisht Radovic.

“Ndeshja ka qenë shumë e mirë, kemi ndjekur Teodon pas fillimit jo të mirë dhe me pak fat një top vendosi fituesin. Djemtë më kanë dëgjuar dhe kanë luajtur me plot energji dhe vendosmëri, tjetër gjë nuk mund të them. I dëshiroj sukses Teodos në fazën tjetër,” ka përfunduar Radovic deklaratën e tij shkruan faqja zyrtare e BIBL sot.

Bashkimi është eliminuar në fazën e parë të garave të BIBL, duke përfunduar si i pesti në Grupin A, mbi Sigal Prishtinën kampione të deritashme, që gjithashtu u eliminua.

Ekipi i Bashkimit kishte start 0-4 në BIBL. Por, me përforcime si Kejuan Johnson, Eric Palm, Ermin Jazvin, etj. krijuan serinë më të mirë të rezultateve të stinorit në BIBL, duke shënuar 4 fitore radhazi dhe duke dalë në vend të dytë të Grupit A.

Dy humbjet e fundit, nga Sigal Prishtina dhe nga Teodo, i kushtuan me eliminim skuadrës, e cila në këto ndeshje nuk kishte ndihmën e përforcimeve të cekura më lartë.