Rahoveci ‘shkrin’ Trepçën

Një çerek i tretë fantastik i Rahovecit 30-4 ka mjaftuar për të përmbysur gjithë punën e bërë në pjesë të parë të lojës nga basketbollistët e Trepçës.

Ndërsa, rikthimi në çerek të katërt u duk i pamundur për mysafirët. Rahoveci ka shënuar fitoren e 16 të stinorit në Superligë dhe me këtë ka siguruar pozitën e tretë edhe matematikisht në fund të stinorit të rregullt.

Pas humbjes nga Ylli, Rahoveci është këndellur plotësisht me fitoren e sotme ndaj Trepçës 82-66 [16-19, 18-26, 30-4 dhe 18-17].

Deshon Minnis ka qenë më i miri te Rahoveci në fitore sot, duke shënuar 23 pikë, 11 asistime dhe 4 kërcime, derisa është ndihmuar edhe nga 25 pikët e Fred Richardsonit që kishte edhe 9 kërcime e 4 asistime në këtë fitore të thellë të vreshtarëve karshi minatorëve.

TABELA AKTUALE

Lojtari tjetër që arriti të shënojë pikë dyshifrore te Rahoveci ka qenë Arian Qallaku, që dha 16 pikë, bashkë me 4 kërcime e 4 asistime.

Te Trepça, që ishte më e mirë vetëm në pjesë të parë të ndeshjes, më i dalluari ka qenë Aaron Anderson me 12 pikë, 3 asistime e 4 kërcime.

Ndërsa, Samir Zekiqi ishte koshashënuesi më i mirë i ekipit me 15 të shënuara.

Në xhiron e radhës Trepça pret Borean, ndërsa Rahoveci është mysafir në Sezai Surroi ndaj Prizrenit.