Real kalon lehtë Galatën

Real Madrid ka arritur edhe fitoren e dytë me radhë në kuadër të Grupit E të Euroleague sonte. 

Ekipi madrilen, që është nënkampion aktual i Euroleague, ka mposhtur lehtë Galatasarayin e Stambollit, duke kapur një seri prej 13-0 në çerekun e dytë të ndeshjes, ku edhe u këput ndeshja përfundimisht. 

Përkundër se turqit tentuan, ata asnjëherë nuk arritën të kërcënojnë rrugëtimin e madrilenëve drejt fitores së thellë, që në fund rezultoi me 93-78. 

Felipe Reyes ka qenë ndër më të dalluarit te Reali me 22 pikë të shënuara dhe 11 kërcime, derisa atij i ndihmuan edhe Rudy Fernandez me 15 pikë dhe Sergio Llull me 12 pikë e 7 asistime. 

Te Galata, që regjistroi disfatën e parë në Grupin E, Zoran Erceg ishte më i dalluari me 17 pikë e 5 kërcime, derisa Carlos Arroyo shënoi 11 pikë e 6 asistime në disfatë.

Reali ka bilanc 2-0 pas dy xhirove të para, derisa Galatasaray 1-1 në Grupin E të Euroleague.