Bowie sjell përvojë në Prishtinë

Sigal Prishtina mbrëmë njoftoi edhe për përforcimin e dytë të saj në afatin kalimtar dimëror.  Borozani.com

Fundori Nate Bowie vjen nga Trikalla e Greqisë, me të cilët shkëputi marrëveshjen në dhjetor. Në elitën greke, ai ka arritur që në dhjetë ndeshje të ketë mesatare prej 10.2 pikëve për ndeshje, 2.2 kërcimeve si dhe 6 asistime. 

Në një intervistë të shkurtër me Borozani.com ai tregoi arsyet e ardhjes në Prishtinë dhe pritjet e tij te kampionja aktuale e Kosovës. 

Borozani: E latë ligën greke për atë kosovare. Pse? 

Bowie: E lashë Greqinë sepse nuk isha i kënaqur me situatën aktuale në klub. Më pëlqeu Greqia dhe njerëzit, sikurse edhe liga, mirëpo besoj gjithmonë se kur puna në një vend, nuk ta jep kënaqësinë atëherë nuk ka arsye të qëndrosh më. Prandaj, edhepse me shifra gjithçka shkonte mirë, nuk isha i lumtur për disa arsye. Sigal Prishtina në anën tjetër ka histori në fitore të shumta dhe mendoj se është rast i mirë për mua të luaj edhe në gara ndërkombëtare siç është Balkan League. 

Borozani: Kishit dëgjuar më parë për ligën e Kosovës? 

Bowie: Po. Kam pasur disa shokë të mirë që kanë luajtur në Kosovë më parë. 

Borozani: Çka mund t’i sjell një lojtar si ti, ekipit? 

Bowie: Së pari mund të sjellë përvojë dhe disa gjëra që ekipi i kërkon nga unë. Nëse ekipi kërkon që të shënojë më shumë, jam në gjendje ta bëj këtë, ose për shembull nëse ata dëshirojnë që të pasojë topin më shumë, edhe këtë mund ta bëj pa problem, për të cilën jam i dëshmuar. Thjesht, do të bëj çkado që trajneri kërkon apo më mirë të them cilido që është ekuacioni i fitores, kjo është e rëndësishmja. 

Borozani: Për ekipin e ri, tifozët e saj dhe motoja juaj… 

Bowie: Besoj se nëse një derë e ke të mbyllur, ajo është mbyllur sepse nuk ka qenë e krijuar për ta hapur ti. Jam i lumtur që kam rastin të luaj në njërin ndër ekipet europiane me tifozë shumë të njohur dhe ekip të njohur. Dua që ta ndihmojë ekipin sa më shpejt të jetë e mundur.

Bowie që ka dalë nga kolegji i Arkansasit në SHBA, ka bërë përvojë në shumë vende europiane. Ai ka luajtur në Maliye (Turqi), Kryvbas (Ukrainë), Rustavi (Gjerorgji) si dhe në ekipe të Portugalisë, Sllovenisë dhe ligës së dytë spanjolle. 

Bowie është përzgjedhur lojtari më i mirë i ligës gjeorgjiane vite më parë, derisa ka bërë pjesë në ekipin më të mirë të vitit në Portugali. 

Basketbollisti 28 vjeç është përforcimi i dytë i Sigal Prishtinës në afatin kalimtar dimëror, pas Desmon Farmerit. 

Sigal Prishtina këtë stinor përveç trofeve në vend, dëshiron që të fitojë edhe ligën ballkanike.