Rogova ngrit Vëllaznimin në renditje

Ka mjaftuar një gol i Rron Rogovës në pjesë të dytë të ndeshjes për të ngritur Vëllaznimin në pozitë të dytë të renditjes tabelare të Ligës së Parë - Grupi A, ndërsa kuqezinjtë e drejtuar nga Leotrim Krasniqi kanë fituar në “Demush Mavraj” ndaj Istogut, 0-1 [Rron Rogova 60’].

Ngritjes së Vëllaznimit në renditje i kontribuoi barazimi në derbin mitrovicas të luajtur në “Sami Kelmendi” ku Trepça e Trepça’89 barazuan. E Vëllaznimi me këtë fitore, dimëron si ekip në vend të dytë, për të vazhduar shpresën e rikthimit në Superligë.

TABELA AKTUALE

Pjesa e parë e ndeshjes përfundoi 0-0, ku as Istogu vendas i drejtuar nga Gani Metaj e as mysafirët nuk arritën të bëjnë më shumë. E në pjesë të dytë ka qenë goli i Rron Rogovës që bëri Vëllaznimin të festojë në fund. Ai u asistua nga Nikson Memaj.

Vëllaznimi mbyllë vjeshtën në pozitë të dytë, ku pas 14 ndeshjesh ka 27 pikë, 4 më pak se liderja Drenica që pësoi për herë të parë këtë stinor sot. Istogu ndërkaq është i teti me 12 pikë dhe do të vazhdojë me shpresë për luftë për mbijetesë në pranverë.