FERONIKELI - LLAPI
Foto: KFFeronikeli/ A. Sinani
Shabani shpëton Feronikelin, 6 pikë larg kreut
8 March, 2017 @14:55
Ashtu si në takimin e luajtur pak javë më parë në kuadër të Kupës së Kosovës, edhe sot Llapi u tregua ‘arrë e fortë’ për kampionin në fuqi të Kosovës sa i përket lojës së treguar, mirëpo përkundër rezistencës së shfaqur, skuadra e Tahir Batatinës u detyrua të kthehet në shtëpi pa pikë, me vendasit që e gjetën golin e fitores në minutën e 90’ të takimit.
Përkundër faktit që pati më shumë raste për shënim, skuadra e Feronikelit golin e fitores nuk e gjeti deri në momentet e fundit të takimit, moment kur Bujar Shabani shënoi me kokë, për t’i dhënë 3 pikë tejet të vlefshme skuadrës së tij. Në minutën e fundit, Feronikeli fitoi edhe në xhiron e kaluar ndaj Dritës.
Rasti i parë për shënim për vendasit u shfaq në minutën e 9’, moment në të cilin Mark Milicaj e qëlloi shtyllën. Rastet vazhduan edhe më tej, ndërsa rol vendimtar në arritjen e golit të fitores patën edhe zëvendësimet sulmuese të Afrim Tovërlanit, një prej tyre edhe Behar Maliqi.
Duhet përmendur që në minutën e 56’ të takimit, një penallti u akordua për skuadrën e Feronikelit, mirëpo pasi gjyqtari kryesor u konsulltua me atë anësor, vendimi u shfuqizua dhe penalltia e dhënë u anulua.
Pas 20 ndeshjeve të luajtura, Feronikeli tashmë ndodhet në vendin e dytë, me 6 pikë më pak se ‘89shi lider, kurse Llapi mbetet me 39 pikë.
