Heroi i përhershëm, Reali në çerekfinale

Përkundër faktit që zhvilloi një pjesë të parë fenomenale, të cilën e mbylli me epërsi shpresëdhënëse për një përmbysje senzacionale, Napoli u tregua skuadër e pafuqishme përballë kampionit në fuqi të Evropës.

Goli i epërsisë për italianët u shënua nga Mertens në minutën e 24’ dhe pjesa e parë u mbyll 1-0, me Realin që dukej i relaksuar për shkak të epërsisë 3-1 nga ndeshja e parë.

Mirëpo, një Napoli komplet tjetër u pa në pjesën e dytë. Ishte kapiteni Ramos, njeriu i derbive e i momenteve vendimtare, ai që i ‘zbriti në tokë’ italianët, me 2 gola ‘ekspres’ në minutat 52’ dhe 57’. Si zakonisht, të dy golat nga Ramos u shënuan me kokë, për ta bërë më pas të parealizueshme dëshirën e Napolit për kalim në çerekfinale e në anën tjetër për t’i siguruar kualifikimin skuadrës së tij. Kur ndeshja veçse ishte e mbyllur, madrilenët e gjetën edhe golin e tretë përmes Alvaro Moratës, për ta mbyllur duelin me rezultat 6-2 nga të dyja ndeshjet.

Duhet përmendur që me 2 golat e shënuara sonte, Sergio Ramos kap shifrën e 81 golave personale në karrierë, shifër kjo jo e zakonshme për një mbrojtës.

Përveç Realit, skuadra tjetër që e ka siguruar çerekfinalen sonte është Bayerni, kurse skuadrat e tjera çerekfinaliste do të përcaktohen nesër dhe mesjavën e ardhshme.

All Goals & highlights HD Napoli 1-3 Real… by Live1Goals