Shifra e tretë më e lartë, Istogu deri nesër lider

Skuadra e Istogut e hapi pjesën e dytë të stinorit në Ligën e Parë, me një fitore të lehtë ndaj Feronikelit.

Nga minuta e parë e deri në fund, Istogu e dominoi ndeshjen dhe në fund e mposhti kundërshtarin me rezultat 49-111.

111 pikët e shënuara ishin shifra e tretë më lartë sivjet në Ligën e Parë. Më herët AS Prishtina kishte shënuar 111 pikë  kundër Prishtinës së Re, derisa rekordin aktual është duke e mbajtur Drita me 113 pikë pikërisht kundër Feronikelit.

Gjashtë basketbollistë shënuan pikë dyshifrore te Istogu. Prej tyre u dalluan Diamant Shabani me 16 pikë, 9 kërcime, 4 asistime e 4 topa të rrëmbyer, Labinot Kelmendi me 15 pikë dhe Terrick Philips me 14 pikë të tjera.

Te Feronikeli i vetmi që u dallua ishte Edison Ibrahimi me 17 pikë.

TABELA AKTUALE

Istogu me një ndeshje më shumë ngritet në krye të tabelës së paku deri nesër, me bilanc prej 8 fitoreve e 2 humbjeve, kurse Feronikeli ka bilanc prej 3 fitoreve e 7 humbjeve.