Shkupi në BIBL

Skuadra e katërt e konfirmuar për stinorin e ri të ligës ballkanike në basketboll është KB Shkupi nga Shkupi.

Faqja zyrtare e BIBL ka bërë të ditur se tashmë ekipi ka konfirmuar pjesëmarrjen në stinorin e 11-të të BIBL, ndërsa ekipi që u themelua pas vite më parë është pjesë e ligës elite të Maqedonisë.

KB Shkupi luan ndeshjen si vendas në palestrën Shaban Tërstena, ndërsa menaxhmenti i BIBL do të vizitojë këto ditë ekipin për të cilin kjo ligë do të jetë hera e parë e pjesëmarrjes në një garë ndërkombëtare.

Deri më tash në BIBL pjesëmarrjen kanë konfirmuar dy ekipe bullgare: Akademik Bultex 99 dhe Beroe, si dhe dy ekipe maqedonase: Kozuv dhe Shkupi.

BIBL ka paraparë tetë (8) ekipe pjesëmarrëse në këtë stinor, ku do të jetë sistemi i ri i garave.

Nga Kosova, ende asnjë ekip s’ka konfirmuar pjesëmarrjen në BIBL. Në stinorët e kaluar, ekipet e Kosovës kanë qenë pjesëmarrës të rregullt të kësaj lige, ku Sigal Prishtina ka fituar dy herë ligën, ndërsa në stinorin e kaluar Bashkimi ka përfunduar si nënkampion.