Shpëtim nga humbja rekorde, e mbyllim ndaj Bullgarisë

Përballja e sontme në Vilnus të Lituanisë ndaj Ukrainës për Kosovën, mund të thuhet se ishte vetëm një shpëtim nga humbja rekorde.

39 pikë diferencë është tepër nga një reprezentacion, i cili vetëm disa ditë më parë na mposhti me 7 pikë në Mitrovicë.

Luhatje e madhe në rezultat që e shkaktoi ndoshta lodhja nga udhëtimi, por duhet pasur parasysh se të njejtën e përjetuan edhe ukrainasit, që luajtën në cilësit të vendasit sonte, pasi që vendi i tyre nuk e pranon Kosovën dhe dueli u zhvillua në shtetin fqinj të tyre.

ORARI DHE TABELA

Kosova në çerekun e parë shënoi vetëm 11 pikë, karshi 30 të pranura, pastaj në çerekun e dytë një paraqitje pak më e mirë, por gjithsesi diferenca shtohej për vendasit.

E në çerekun e tretë pasoi debakli kur shënuam vetëm 8 pikë, karshi 26 të pranuarave.

Krejt në fund, rezultati përfundimtar 100-61 flet mjaft.

Dardan Berisha shënoi 20 pikë dhe 5 kërcime në këtë ndeshje, ndërsa pikë dyshifrore shënuan edhe Justin Doellman, 13 dhe Alban Veseli 12.

Ukraina shkëlqeu thjesht dhe nëse asgjë, e meriton së paku kualifikimin në Eurobasket 2017 pas Sllovenisë nga Grupi E. Pesë lojtarë me pikë dyshifrore, ndërsa Mishula shënoi 21, Kravtsov 16 pikë, 12 kërcime, Fesenko 16 pikë, 4 kërcime e Bobrov 16 pikë të tjera në fitore.

Pas kësaj ndeshjeje Ukraina ka bilanc 4-1, ndërsa Kosova 0-5.

Kosova i mbyll kualifikime në shtëpi të shtunën, ndaj Bullgarisë, me të vetmen shpresë fitore me 20 pikë diferencë për të arritur kualifikimet për Kampionatin Botëror “Kina 2019”.