S’ka bllokadë për Kosovën

Federata e Basketbollit të Serbisë (KSS) nuk mund të bllokojë më anëtarësimin e Federatës së Basketbollit të Kosovës (FBK) në FIBA. 

Kështu ka thënë njeriu më me ndikim në FIBA, Borislav Stankovic, që është sekretar nderi i FIBA-së aktualisht. 

Në një intervistë për Vecernje Novosti të Beogradit, Stankovic ka bërë të ditur se pranimi i Komitetit Olimpik të Kosovës në Komitetin Olimpik Ndërkombëtar - është më me rëndësi sesa pranimi i Kosovës në Kombet e Bashkuara si shtet, që rrjedhimisht nuk lë gjasa për bllokim të anëtarësimit të Kosovës, FBK-së, në FIBA. 

“Kjo çështje tashmë është betejë e humbur. KSS është më mirë të mirret me problemet tjera, të brendshme,” ka thënë ndër të tjera Stankovic 79 vjeç, transmeton gazeta beogradase në fjalë. 

FBK javën që shkoi aplikoi edhe zyrtarisht në FIBA për pranim dhe optimizmi i madh i drejtuesve të basketbollit kosovar ka qenë i arsyeshëm, që tashmë po konfirmohet edhe nga njeriu që në FIBA - njihet si njeriu kyq i basketbollit botëror. 

Vendimi i FIBA-së për pranim të Kosovës pritet të mirret muajin që vjen, më 12-13 mars kur mblidhet Komiteti Ekzekutiv i shtëpisë botërore të basketbollit.