Spanjë-SHBA, statistika para gjysmëfinales

Me fillim nga ora 20:30, sonte zhvillohet gjysmëfinalja e parë e basketbollit në kuadër të Lojërave Olimpike ‘Rio 2016’. Finalisti i parë do të përcaktohet në duelin mes SHBA-ve favorite dhe Spanjës, e cila synon befasinë.

Në fazën grupore, SHBA-të bënin pjesë në Grupin A dhe në 5 ndeshjet e zhvilluara, ata patën 5 fitore, duke kaluar pa kurrfarë problemi të gjithë kundërshtarët, duke përfshirë këtu edhe Australinë e Serbinë, dy përfaqësueset të cilat takohen në gjysmëfinalen tjetër në mëngjesin e 20 gushtit. Edhe pse pa LeBron Jamesin apo Steph Curryn, SHBA-të gjatë këtyre Lojërave Olimpike ishin nën udhëheqjen e yllit Kevin Durant, i cili në këtë turne po luan me një mesatare prej 18.5 pikësh për ndeshje dhe po gjuan me saktësi 62,1% nga loja, ndërsa në pesëshën startuese përveç tij zakonisht ishin edhe Kyrie Irving, Klay Thompson, Carmelo Anthony dhe DeAndre Jordan.

Pas grupeve, SHBA-të eliminuan pa problem Argjentinën, për t’u kualifikuar në gjysmëfinalen e turneut. Vlen të përmendet që kundërshtari më i denjë i SHBA-ve në 6 ndeshjet e zhvilluara gjithsej në Rio ishte Serbia, e cila mund të jetë kundërshtari potencial i SHBA-ve edhe në finale. Për dallim nga ndeshjet tjera që amerikanët i fituan bindshëm, ndaj Serbisë ata fituan me rezultat të ngushtë 94-91.

Në anën tjetër, Spanja ishte pjesë e Grupit B, grup të cilin e mbylli me 3 fitore e 2 humbje. Spanja mposhti Nigerinë, Lituaninë dhe Argjentinën, ndërsa u mposht nga Kroacia dhe Brazili, duke e mbyllur kështu grupin si vendi i dytë pas Kroacisë lidere.

Në çerekfinale, Spanja mposhti lehtësisht Francën, në një takim që pritej të ishte më interesant. Në mungesë të Marc Gasolit, lideri i Spanjës në këtë turne ishte Nikola Mirotic, ndërsa kontributin e tyre e dhanë edhe Pau Gasol, Rudy Fernandez, Sergio Llull e Ricky Rubio, si pesëshe e zakonshme startuese e iberikëve.

PËRBALLJET DIREKTE

Kur jemi te përballjet direkte, SHBA-të dhe Spanja janë takuar plot 11 herë dhe në të gjitha takimet e luajtura, fitorja iu ka takuar amerikanëve. Mesatarja e epërsisë në 11 fitoret e SHBA-ve ndaj Spanjës është 24.1 pikë.

Të udhëhequr nga strategu italian Scariolo, me Pau Gasolin e zhvendosur në qendër për shkak të mungesës së vëllaut të tij Marc, me Nikola Miroticin e Willy Hernangomezin në formë të mirë dhe me pjesën tjetër të lojtarëve me përvojë si Jose Calderon, Juan Carlos Navarro, Rudy Fernandez, Sergio Llull e Ricky Rubio, Spanja synon që këtë vit ta thyejë tabunë në ndeshjet ndaj SHBA-ve dhe ta fitojë medaljen e artë olimpike, të cilën kanë dështuar ta marrin në Londër e në Pekin, përkundër faktit që kishin arritur deri në finale.

Ndërkohë, SHBA-të të udhëhequr nga trajneri Krzyzewski, me skuadër kryesisht të shpejtë dhe ‘të shkurtër’, synojnë ta vazhdojnë stilin e tyre, me lojë të bukur e atraktive, të bazuar kryesisht në gjuajtje nga distanca dhe depërtime individuale.