Të punojmë për të ardhmen

Trajneri i ri i Rahovecit, Jeton Nixha, ka folur sot për faqen zyrtare të klubit, ku ka shpalosur idetë dhe planet e tij para stinorit të ri të Superligës.

Rahoveci për herë të parë në histori të klubit do të jetë pjesë e Superligës së Kosovës në basketboll në edicionin 2016/17.

“Jam i vetëdijshëm se kemi probleme me infrastrukturë. E sa i përket lojtarëve do të koncentrohemi te vendorët fillimisht, derisa baza do të jenë nga qyteti,” ka thënë Nixha fillimisht.

Ai ka bërë të ditur gjithashtu se nëse ka përkrahje, do të punojë me gjeneratat e reja për një të ardhme të mirë të basketbollit të Rahovecit.

Kurse, sa i përket synimeve me ekipin ai është treguar real duke pretenduar mbijetesën.

“Mbijetesa është synimi ynë primar. Mos të bëhemi si disa ekipe tjera që kanë hyrë furrishëm në Superligë dhe brenda 2-3 viteve janë humbur nga harta e basketbollit. Dalëngadalë do të ngrisim nivelin si të ekipit ashtu edhe të aspiratave, e pastaj pse jo të rrisim edhe synimet,” ka thënë ai.

Rahoveci ka pasur një stinor fantastik vitin e kaluar në Ligë të Parë, derisa ishte nën drejtimin e trajnerit Valentin Spaqi. Klubi me të përfunduar edicioni falenderoi atë për kontributin e dhënë dhe solli në vend të tij Nixhën, të cilin e zyrtarizoi sot.

Pjesën më të madhe të ndeshjeve në stinorin e kaluar Rahoveci e ka zhvilluar në Suharekë, ku edhe në fund të edicionit ngriti trofeun e triumfuesit të Ligës së Parë.