Berisha: Jemi gati për Kosovën

Në prezentimin e sponzorit gjeneral të përfaqësueses së Kosovës në basketboll sot në zyret e Federatës së Basketbollit të Kosovës (FBK) ka qenë edhe Dardan Berisha, që në vitet e fundit është lojtari më i mirë vendor në Superligë.

Ai përveç tjerash ka bërë të ditur se ekipi është në përgatitje intenzive dhe Kosova pritet që të ketë paraqitje të denjë në kualifikime për Eurobasket, përkundër grupit të vështirë që ka.

“Atmosfera në skuadër është shumë e mirë. Të gjithë lojtarët vendorë jemi duke punuar me vullnet të madh dhe tani po presim të na bashkohen edhe basketbollistët e natyralizuar dhe kështu të kompletohemi. Ne jemi të vetëdijshëm për gjithë atë që na pret, andaj edhe kemi filluar më herët me përgatitjet e përbashkëta. Intensiteti i punës po rritet nga ditë më ditë dhe besoj se do të jemi të gatshëm së pari për ndeshjet miqësore dhe më pas edhe për ato kualifikuese. Këto kualifikime janë historike për Kosovën, por edhe nuk do të jetë aspak lehtë, pasi dihet se grupi ynë është shumë i vështirë. Po ashtu ne na mungon përvoja, por do të mundohemi ta kompensojmë me punë dhe angazhim maksimal në parket. Jam i bindur se për të gjithë ne është krenari prezantimi i shtetit tonë në gara të nivelit të tillë siç janë kualifikimet për Eurobasket 2017,” ka thënë Berisha sot në konferencë për shtyp.

Kosova ndeshjen e parë në kuadër të kualifikimeve për Kampionatin Evropian do ta luaj kundër Sllovenisë si mysafire më 31 gusht. Ndërkaq ndeshjen e dytë Kosova do ta luaj si nikoqire më 3 shtator kundër Ukrainës, kurse më 7 shtator është mysafire e Bullgarisë, derisa më 10 shtator e pret Slloveninë, pastaj udhëton në Ukrainë më 14 shtator dhe ndeshjen e gjashtë e të fundit në kuadër të këtyre kualifikimeve do ta zhvilloj si nikoqire më 17 shtator ndaj Bullgarisë.