T’i tregojmë botës kush jemi!

Përfaqësuesja e re e Kosovës po vazhdon stërvitjet për turenun Basketball Wienn 2013, që do të mbahet në Vienë të Austrisë. Ndërsa kapitenja e vashave të kaltra, Zërina Shatri, tregon atmosferën në ekip dhe pritjet nga bashkëlojtaret para nisjen në turneun e parë ndërkombëtar.

“Atmosfera është fantastike në ekip. Ne punuam mirë në Prizren, përkundër temperaturave të ulëta. Ka gjëra natyrisht që duhet përmirësuar, por ne po e motivojmë njëra-tjetrën, ashtu që të bëhemi edhe më të mira,” ka thënë Shatri për portalin tonë.

Aty mund të ketë kundërshtarë prej më të ndryshmëve, pasi që vinë na shumë vende të botës si ekipe ashtu edhe ndonjë përfaqësuese. Sa është Kosova e përgatitur?

“Të gjitha e kemi të qartë arsyen e shkuarjes në Austri, prandaj me seriozitet të nivelit të lartë, punojmë në stërvitje dhe me këtë ritëm do të vazhdojmë deri në fund të tyre, bashkë me përzgjedhësen Elvira Dushku dhe trajneren Elinda Musliu,” ka shtuar Zërina që luan në pozitën e qendrës.

Të gjitha janë nën moshën 18 vjeçare dhe për shumicën nga ato është dalja e parë në arenën ndërkombëtare edhe individualisht. Pritjet…

“Duke e ditur që jemi mbledhur më të mirat e Kosovës dhe kjo për herë të parë, duam t’iu tregojmë shteteve dhe ekipeve tjera se edhe ne kemi traditë basketbolli dhe duam ta përfaqësojme vendin tonë në mënyrë sa më të mirë,” ka përfunduar kapitenja e përfaqësueses U18 të Kosovës që më 25 të këtij muaji niset për në Vienë. 

Përfaqësuesja e Kosovës U18 përgatitjet i zhvilloi në Prizren, tash udhëton në Gjilan para përfunimit të tyre në Prishtinë, ku do t’i masin forcat me skuadrën e Sigal Prishtinës.