Trepça përsëri mposht Prishtinën dhe merr pastër kreun e tabelës

Ekipi i Trepçës është kthyer në formë, ndërsa të drejtuar nga Adis Beciragic mitrovicasit kanë përjetuar edhe një fitore ndaj Prishtinës këtë stinor në Superligë. Kësaj radhe, ata i mposhtën kryeqytetasit në “1 tetori” për të fituar dy duelet e para ndaj tyre këtë stinor në Superligë.

Çereku i parë është treguar fatal për Prishtinën sonte. Trepça bëri avantazh prej 9 pikësh në 10 minutëshin e parë të ndeshjes për të shkuar tutje në ndeshje duke ruajtur distancën në secilin fund-çerek dhe për të arritur te fitorja me 10 pikë dallim, 66-76.

TABELA AKTUALE

Mikaile Tmusic luajti me 15 pikë, 5 asistime e 7 kërcime në fitore, ndërsa nga 14 pikë dhanë Erjon Kastrati e Kevin Bracy-Davis. Davis regjistroi edhe 8 kërcime, derisa Darnell Edge dha 9 pikë e Drilon Hajrizi 7 në këtë fitore.

Te Prishtina më të dalluarit ishin Dardan Berisha me 19 pikë, 3 asistime e po aq kërcime, si dhe Derrick Wilson me 17 pikë e 7 asistime.

Me fitore, Trepça tash është bërë lidere e pastër e Superligës nga 10 ndeshje me bilanc 8-2. Ndërkaq Prishtina është në bilanc neutral, 5-5, në pozitë të pestë. Prishtina në këtë ndeshje doli me ndihmës-trajnerin Albert Sylejmani, pasi që dje u nda me lituanezin Zydrunas Urbonas. Por, kjo nuk solli asgjë të re në ekip. Prishtina përsëri nuk tregoi veten, përkundër fondit të mirë të lojtarëve që ka.