Ylli perfekt në ciklin e fundit, ndërprenë serinë e fitoreve të Trepçës

Fundi i stinorit të rregullt ka kapur derbin me skuadrat më në formë në Superligë. Ylli hyri në ndeshje me gjashtë fitore radhazi, kurse Trepça lidere e stinorit të rregullt, me njëzetë të tilla.

E në fund, Ylli në ndeshje mjaft interesante, ka arritur që të shënojë fitoren e shtatë me radhë dhe t’ia ndërpresë mitrovicasve ecurinë prej 20 fitoreve radhazi në Superligë.

Ylli fitoi ndeshjen me rezultat 81-79, ndërsa përballja ka shkuar thuajse barabartë me suharekasit që epërsinë më të madhe e kishin shtatë pikë gjatë ndeshjes, njëjtë sikurse kundërshari i tyre i sotëm.

Dueli kaloi me shkëlqimin e Alonzo Verge te Ylli e Darnell Edge te Trepça, ku Verge kreu lojën me 35 pikë, 2 asistime e 7 kërcime, ndërsa Edge dha 26 pikë, 3 asistime e 2 kërcime.

TABELA AKTUALE

Por, derisa te Ylli i drejtuar nga Petar Mijovic edhe dy lojtarë tjerë shënuan pikë dyshifrore (Nate Grimes 11 pikë e 11 kërcime, Vincent Cole 15 pikë) te Trepça ka qenë vetëm Drilon Hajrzi që ka arritur pikë dyshifrore, duke e kryer lojën me 12 të shënuara.

Ylli me këtë fitore barazoi bilancin me Pejën 19-9, por për shkak të dueleve të ndërsjella më të mira, Peja mbetet e dyta në renditje, ndërsa Ylli përfundon stinorin në vend të tretë. Trepça lidere e padiskutueshme me 25-3 (2 humbje prej të cilave nga Ylli këtë stinor) shkon direkt në gjysmëfinale të playoffit.

Derisa Ylli do të ketë punë me Bashkimin në çerekfinale të playoffit ku luhet deri në dy fitore me sistem 1-1-1, Trepça do të presë në gjysmëfinale fituesin e përballjes çerekfinale Prishtina-Vëllaznimi.