YLLI - LIPJANI
Ylli siguron gjysmëfinalen
11 April, 2019 @20:33
Edhe pse e pritur, tashmë edhe matematikisht Ylli ka siguruar gjysmëfinalen e PlayOffit të Superligës.
Me fitoren e sontme bindëse ndaj Lipjanit, ekipi i Arben Krasniqit ka treguar se është ndër kandidatët më serioz për të arritur finalen e PlayOffit, pas kualifikimit direkt në gjysmëfinale.
Ylli ka triumfuar me 53 pikë dallim ndaj lipjanasve, 134-81, derisa Egzon Kuqi ka kryer ndeshjen me 29 pikë, 4 kërcime e 3 asistime. 21 pikë ka shënuar Alban Veseli në fitore, ndërsa të gjithë lojtarët e futur në lojë nga trajneri Krasniqi kanë shënuar pikë sonte.
Te Lipjani më efikasi ka qenë Mike Mitchell me 23 pikë, ndërsa 18 pikë i ka shënuar Arian Memeti, që ka shtuar edhe 8 kërcime në llogari të tij.
Ylli ka shënuar fitoren e 19 të stinorit dhe tashmë plasohet direkt në gjysmëfinale, ndërsa Lipjani do të pres humbësin e finales së PlayOffit të Ligës së Parë [Feronikeli-Vëllaznimi] për të kërkuar shpëtimin e stinorit në Superligë.
