100% dhe të kompletuar

Basketbollisti më i mirë vendor i Prishtinës, Dardan Berisha, në konferencën e sotme për shtyp para mediave ka thënë se ekipi është i gatshëm për përballjen e parë të stinorit në FIBA Europe Cup.

“Definitivisht e kemi pritur këtë moment. Kemi ushtruar shumë, në mënyrë intensive, dy herë në ditë, me taktikë të re dhe jemi të gatshëm që të japim 100%-shin tonë, secili lojtar,” ka thënë ylli vendor i bardhekaltërve.

“Aktualisht nuk kemi asnjë të lënduar në skuadër. Jemi të kompletuar. Besoj që edhe tifozët do të vinë dhe palestra të mbushet. Atmosfera e mirë besoj se do të ndikojë pozitivisht për ne karshi ekipit të Ukrainës që është shumë i fuqishëm,” ka bërë thirrje për publikun kapiteni i reprezentacionit të Kosovës.

“Fizikisht dhe mentalisht jemi përgatitur për këtë sfidë të madhe. Qëllimi kryesor është të kalohet grupi, e për këtë duhet fituar të gjitha ndeshjet, sidomos ato si vendas,” ka cekur Dardani.

Prishtina luan nesër ndaj Cherkaski Mavpyt në përballjen që nis prej orës 20:00 në Pallatin e Rinisë dhe të Sporteve në kryeqytet.