12 ose 13 mars, data e vendimit!

Federata e Basketbollit të Kosovës, ka tejkaluar pritjet e FIBA-së me përgatitje. Drejtuesit e FBK-së që kanë qëndruar në Gjenevë të Zvicrës, sot edhe zyrtarisht kanë dorëzuar aplikacionin për pranim të plotë në FIBA, para zyrtarëve të saj më të lartë.  Borozani.com

“Kemi kaluar shumë mirë në takimin e sotëm. Kemi dorëzuar aplikacionin për pranim të plotë në FIBA. Aplikacioni ynë është konstatuar të jetë shumë dokument cilësor dhe përmban të gjitha elementet që kërkohen nga zyra ligjore e shtëpisë së basketbollit botëror,” ka thënë kreu i FBK-së, Erolld Belegu, ekskluzivisht për Borozani.com nga Gjeneva përmes telefonit. 

Më tej ai ka konfirmuar se tashmë kategoritë e reja të përfaqësueses do të mund të marrin pjesë në kualfikimet përkatëse, derisa edhe ekipet kosovare do të mund të luajnë në gara ndërkombëtare, natyrisht, krejt kjo pas pranimit zyrtar, që pritet të bëhet më 12 dhe 13 mars në mbledhjen e Komitetit Ekzekutiv të FIBA-së. 

“Përgjigjja definitive për Kosovën do të bëhet e ditur më 12 ose 13 mars nga Komiteti Ekzekutiv i FIBA-së,” ka shtuar në fund Belegu. 

Pritjet e FBK-së për pranim janë të mëdha, pasi që aplikimi dhe dokumentacioni i dorëzuar ka qenë cilësor dhe i punuar me kujdes maksimal, ndërsa barriera tjera nuk ka.