Prishtina godet me Trajkovskin

Sigal Prishtina ka bërë goditje të madhe në përforcim të skuadrës. Reprezentuesi maqedon, si dhe lojtari më i mirë vendor në elitën maqedonase në stinorin e kaluar, Bojan Trajkovski, është anëtari i ri i Sigal Prishtinës. 

Njoftimin e kanë bërë të ditur mediat maqedone, derisa edhe ekipi i tij i deritashëm Energa Czarni nga Polonia, ka konfirmuar lirimin e alo-qendrës maqedonase në fjalë. 

Me këtë përforcim Sigal Prishtina mëton të bëhet njëra ndër skuadrat më të forta të ligës ballkanike, pasi që haptas disa drejtues të saj kanë shprehur dëshirën për të sjellë këtë trofe në Kosovë. 

Ai ka luajtur me 8.1 pikë dhe 3.4 kërcime mesatarisht për ekipin polak këtë stinor, derisa pritet të bëhet një kullë binjake me Edin Bavcicin nën koshin prishtinas. 

Trajkovski 26 vjeç, ka punuar edhe më parë me trajnerin aktual të Prishtinës, Marjan Ilievski, pasi që kanë qenë bashkë te Liria e Shkupit më parë, derisa ai ka bërë karrierë edhe te Feni Industri, Torus, Rabotnicki dhe Balkan Steel.