Aguero në fund, City afër finales

Në takimin e parë gjysmëfinal të Kupës së Ligës, Manchester City e ka mposhtur në sekondat e fundit skuadrën e Bristol Cityt, skuadër kjo që sonte zhvilloi një paraqitje fenomenale pavarësisht rezultatit final të duelit.

Skuadra që luan në Championshipin anglez pjesën e parë e mbylli me epërsi 0-1, mirëpo sulmet e parreshtura të Cityt në pjesën e dytë bënë që ndeshja të përmbyset dhe fitorja e ‘qytetarëve’ erdhi me golat e De Bruynes dhe Agueros. Ky i fundit u inkuadrua nga banka rezervë dhe golin e shënoi në sekondat e fundit të ndeshjes.

Fitorja e arritur sonte bën që City të jetë shumë pranë finales së Kupës së Ligës, pasi që takimin kthyes, në të cilin nuk vlen rregulla e golit mysafir përveç nëse skuadrat shkojnë në kohën shtesë, City e nis me një gol epërsi.

Në gjysmëfinalen tjetër të kësaj kupe takohen Chelsea e Arsenali nesër mbrëma në ‘Stamford Bridge’.